Sobre a Autoridade

Friedrich Engels

Março de 1873


Escrito: Outubro de 1872 - Março de 1873
Primeira Edição:  Dezembro de 1873 na colectánea "Almanacco Republicano per l'anno de".
Fonte: amavelmente cedido por "Primeira Linha em Rede"
HTML:  por  José Braz para o Marxist Internet Archive.


Alguns socialistas abrírom, nestes últimos tempos, umha campanha em regra contra aquilo a que chamam o princípio da autoridade. Basta dizer-lhes que este ou aquele acto é autoritário para que o condenem. Abusam de tal modo desta maneira sumária de proceder que é preciso examinarmos a cousa mais atentamente. Autoridade, no sentido próprio da palavra, quer dizer: imposiçom da vontade de outrem sobre a nossa; e, por outro lado, autoridade supom subordinaçom. Ora, na medida em que estas duas palavras soam mal e que a relaçom que representam é desagradável para a parte subordinada, trata-se de saber se há meio de passar sem elas e se - dado as actuais condiçons da sociedade - poderemos dar à vida um outro estado social no qual essa autoridade nom tenha mais razom de existir e onde, por conseguinte, deva desaparecer. Examinando as condiçons económicas, industriais e agrícolas que estám na base da actual sociedade burguesa, verificamos que tendem a substituir cada vez mais a acçom isolada pola acçom combinada dos indivíduos. A indústria moderna substituiu as pequenas oficinas de produtores isolados polas grandes fábricas e oficinas onde centenas de operários vigiam máquinas complexas movidas polo vapor; os carros e as camionetas nas grandes estradas som suplantados polos comboios nas vias férreas, tal como as pequenas escunas e faluas à vela o fôrom polos barcos a vapor. A própria agricultura caiu pouco a pouco no domínio da máquina e do vapor, os quais substituem lenta, mas inexoravelmente, os pequenos proprietários polos grandes capitalistas que cultivam com a ajuda de operários assalariados grandes superfícies de terrenos. Em todo o lado a acçom independente dos indivíduos é substituída pola acçom combinada, a complicaçom dos processos interdependentes. Mas, quem di acçom combinada, di organizaçom; ora, é possível a organizaçom sem a autoridade?

Suponhamos que umha revoluçom social tenha destronado os capitalistas que presidem agora a produçom e a circulaçom das riquezas. Suponhamos, para nos colocarmos por completo no ponto de vista dos anti-autoritários, que a terra e os instrumentos de trabalho se tornárom a propriedade colectiva dos trabalhadores que os empregam. A autoridade terá desaparecido ou terá pura e simplesmente mudado de forma? Vejamos.

Tomemos por exemplo umha fiaçom de algodom. O algodom deve passar polo menos por seis operaçons sucessivas antes de ser reduzido a fio, operaçons que se fam, na sua maioria, em salas diferentes. Além disso, para manter as máquinas em movimento, é preciso um engenheiro que vigie a máquina a vapor, mecánicos para as reparaçons quotidianas e numerosos serventes que transportem os produtos de umha sala para a outra, etc.

Todos estes operários, homens, mulheres e crianças som obrigados a começar e a acabar o seu trabalho a horas determinadas pola autoridade do vapor que nom se importa com a autonomia individual. É preciso pois, primeiramente, que os operários se entendam quanto às horas de trabalho, e que essas horas, umha vez fixadas, se tornem a regra para todos, sem nengumha excepçom. Depois, em cada umha das salas e constantemente, surgem questons de detalhe sobre o modo de produçom, sobre a distribuiçom dos materiais, etc., questons que é preciso resolver imediatamente, sob pena de ver parar toda a produçom; quer se resolvam pola decisom de um delegado proposto por cada ramo de trabalho, ou, se possível, polo voto da maioria, a vontade individual deve sempre subordinar-se; quer isto dizer que as questons serám resolvidas autoritariamente. O mecanismo automático de umha grande fábrica é bem mais tiránico do que algumha vez o conseguirám ser os pequenos capitalistas que empregam os operários. Polo menos nas horas de trabalho pode-se inscrever na porta da fábrica: Lasciate ogni autonomia voi che entrate![1]. Se, pola ciência e polo seu génio inventivo, o homem submeteu as forças da natureza, estas vingam-se submetendo-o, já que delas se usa, a um verdadeiro despotismo independente de qualquer organizaçom social. Querer abolir a autoridade na grande indústria, é querer abolir a própria indústria, é destruir a fiaçom a vapor para voltar à roca de fiar. Tomemos, como outro exemplo, o caminho de ferro. Também aí, a cooperaçom de umha infinidade de indivíduos é absolutamente necessária, cooperaçom que deve ter lugar em horas bem precisas para que nom ocorram desastres. Também aí, a primeira condiçom para o seu uso é umha vontade dominante que resolva todas as questons subordinadas, vontade representada quer por um único delegado, quer por um comité encarregado de executar as decisons de umha maioria de interessados.

Num ou noutro caso, há umha autoridade muito pronunciada. Mas, o que é mais: que aconteceria ao primeiro comboio que partisse se se abolisse a autoridade dos empregados do caminho de ferro sobre os senhores passageiros? Mas a necessidade da autoridade, e de umha autoridade imperiosa, nom pode ser mais evidente que num navio em alto mar. Aí, no momento do perigo, a vida de todos depende da obediência instantánea e absoluta de todos à vontade de um único.

Quando avanço tais argumentos contra os mais furiosos anti-autoritários, estes nom sabem o que responder:"Ah! Isso é verdade, mas o que damos aos delegados nom é umha autoridade, mas sim umha missom!". Estes senhores julgam ter mudado as cousas quando só mudárom os nomes. Eis como estes profundos pensadores gozam com as pessoas.

Acabamos pois de ver que, por um lado, umha certa autoridade, atribuída nom importa como, e, por outro lado, umha certa subordinaçom som cousas que, independentemente de toda a organizaçom social, se imponhem a nós devido às condiçons nas quais produzimos e fazemos circular os produtos.

Vimos, além disso, que as condiçons materiais de produçom e da circulaçom se complicam inevitavelmente com o desenvolvimento da grande indústria e da grande agricultura e tendem cada vez mais a estender o campo dessa autoridade. É pois absurdo falar do princípio da autoridade como de um princípio mau em absoluto, e do princípio da autonomia como de um princípio bom em absoluto. A autoridade e a autonomia som coisas relativas cujos domínios variam nas diferentes fases da evoluçom social. Se os autonomistas se limitassem a dizer que a organizaçom social do futuro restringirá a autoridade aos limites no interior dos quais as condiçons de produçom a tornam inevitável, poderíamos entender-nos; em vez disso, permanecem cegos perante todos os factos que a tornam necessária, e levantam-se contra a palavra.

Porque é que os anti-autoritários nom se limitam a erguer-se contra a autoridade política, contra o Estado? Todos os socialistas concordam em que o Estado político e com ele a autoridade política desaparecerám como conseqüência da próxima revoluçom social, ou seja, que as funçons públicas perderám o seu carácter político e se transformarám em simples funçons administrativas protegendo os verdadeiros interesses sociais. Mas os anti-autoritários pedem que o Estado político autoritário seja abolido de um golpe, antes mesmo que se tenham destruído as condiçons sociais que o figérom nascer. Pedem que o primeiro acto da revoluçom social seja a aboliçom da autoridade. Já algumha vez vírom umha revoluçom, estes senhores? umha revoluçom é certamente a cousa mais autoritária que se poda imaginar; é o acto polo qual umha parte da populaçom impom a sua vontade à outra por meio das espingardas, das baionetas e dos canhons, meios autoritários como poucos; e o partido vitorioso, se nom quer ser combatido em vao, deve manter o seu poder polo medo que as suas armas inspiram aos reaccionários. A Comuna de Paris teria durado um dia que fosse, se nom se servisse dessa autoridade do povo armado face aos burgueses? nom será verdade que, polo contrário, devemos lamentar que nom se tenha servido dela suficientemente? Assim, das duas umha: ou os anti-autoritários nom sabem o que dizem, e, nesse caso, só semeiam a confusom; ou, sabem-no, e, nesse caso, atraiçoam o movimento do proletariado. Tanto num caso como noutro, servem a reacçom.


Notas:

[1] Vós que aqui entrais, abandonai toda a autonomia! - Dante, A Divina Comédia, O"Inferno", Canto III.. (retornar ao texto)

Inclusão 22/10/2005